Նորաձևության հայկական խորհրդի անդամ, դիզայներ Լիլիթ Մարգարյանն այսօր մամուլի ասուլիսում ներկայացրեց, թե ինչպես պետք է դիմավորել Վիշապի տարին: «Կենդանակերպի բոլոր նշաններից Վիշապը տարբերվում է նրանով, որ այն հորինված կենդանի է, չնայած դրան` մենք գիտենք, որ նա փառասեր է, հարստության հովանավորն է»,-ասաց Լիլիթ Մարգարյանը: Նա խորհուրդ տվեց Ամանորի գիշերը սեղաններին դնել շողշողացող, բյուրեղյա բաժակներ, ոսկեզօծ սպասք, քանի որ Վիշապը սիրում է իրեն դիմավորել արքայավայել: Նա նշեց, որ հագուստներ ընտրելիս էլ չպետք է մոռանալ շքեղ և փայլուն զգեստները: Հաշվի առնելով, որ լեգենդներում վիշապները հանդիսացել են ոսկե հանքերի պահապաններ, հետևաբար Ամանորի գիշերը պետք է կրել թանկարժեք զարդեր, ոսկեղեն: «Վիշապի ամենասիրելի գույները կանաչն ու կարմիրն են, ուստի խորհուրդ է տրվում Ամանորի գիշերը դիմավորել փայլփլուն, վառ գույների հագուստներով: Տոնածառը նույնպես պետք է զարդարել, ինչպես միշտ` շքեղ, փայլուն»,-ասաց նա: Լիլիթ Մարգարյանը ներկայացրեց, թե ամեն կենդանակերպի նշանին ինչ գույնի զգեստ է խորհուրդ տրվում կրել Ամանորի գիշերը: Այսպիսով նա ասաց, որ Վիշապի լավագույն ընտրությունը կլինի դեղինն ու ոսկեգույնը: Օձերին հաջողություն կբերեն թագավորական կարմիրը, թավշե ատլասե զգեստները: Ձիերի կենդանակերպի տակ ծնվածներին նույնպես կարմիր գույնը հաջողություն կբերի: Խոյերին, Ցուլերին, Շներին` դեղին գույնը` ոսկե զարդերով: Կապիկներին, Աքլորներին մեծ հաջողություն կբերի սպիտակը: Վարազներին խորհուրդ է տրվում կրել սև զգեստ` ծավալուն ֆորմաներով, զարդարված փետուրներով, փոռիկներով: Առնետներին ևս հաջողություն կբերի սև գույնը, իսկ Վագրերին և Նապաստակներին խորհուրդ է տրվում կրել կանաչ գույնի զգեստ` ոսկե զարդերով: «Այս ամենը կարևոր է, սակայն ամենակարևորը բարձր տրամադրությունն է»,-հավելեց դիզայները:
